LAOAG CITY – Mangiwayat ti tignay protesta ti Kabataan Partylist Ilocos kagiddan iti pananglagip ti maika-53 a tawen ti Martial Law ditoy pagilian inton Septiembre 21.
Segun ken ni Ms. Angel Galimba, mangidadaulo ti Kabataan Partylist Ilocos, adda ti maisayangkat a misa iti oras ti alas diyes ti bigat iti Iglesia Filipina Independiente ditoy siudad ti Laoag nga atendaran dagiti mannalon ken mangngalap manipud kadagiti nagduduma a gunglo, United Church of Christ in the Philippines, Roman Catholic pakairamanan dagiti agtutubo.
Inbatadna a kalpasan ti misa ket insigida nga iwayatda ti tignay protesta no sadinno a ditoy nga ipanawaganda dagiti amin nga arungaingda kas ti kumarkaro a korapsion ditoy Pilipinas.
Malaksid iti daytoy, kunana a kalikagumda pay nga ipadanon iti gobierno ti nayon a pundo para iti edukasion, pannakaikkat ti National Task Force to End Local Communist Armed Conflict, isardeng ti pannakaipasdek kadagiti renewable energy projects a makadadael iti aglawlaw ken pannakaipaay ti pamastrek para kadagiti mannalon ken mangngalap.
Inlawlawagna a ti pannakaipatungpal ti “No permit, no rally” ket saan a nainkalintegan a pagannurotan ti Philippine National Police gapu ta daytoy ket maysa a wagas tapno maiyebkas ti sakit ti nakemda kontra kadagiti maanomalya a mapaspasamak iti babaen ti gobierno.
Innayonna a dumanon iti agarup 100 nga indibidual ti makipagpaset iti nasao a tignay protesta ditoy siudad ti Laoag.
Immuna iti daytoy, inpakaammo ni Mr. Niño Oconer, Secretary General ti La Union Peace and Justice Advocates nga adda pay ti maiwayat a tignay protesta idiay San Fernando City, La Union ken Vigan City.
