LAOAG CITY – Nagpanawagan ni Brgy. Kagawan Manny Morales iti Brgy. 1 ditoy siudad ti Laoag ti naan-anay a tulong manipod kadagiti naayat a tattao.
Daytoy ket gapu iti agtultuloy a pannakailockdown ti nasao a barangay gubuay ti panagadu ti kaso ti covid-19.
Segun ken ni Morales, umaboten iti 556 a pamilya iti nasao a barangay ti nakaawat ti ayuda manipod iti CSWDO.
Nu pay kasta, inbatad na a saan a makaanay daytoy gapu ta bayat a manay-nayunan ti kaso iti Brgy. 1 ket dakdakkel ti posibilidad ti pannakaiyalud-od ti lockdown.
Mainaig iti daytoy, kuna na a ti nabatbati a pondo ti barangay itay napan a tawen 2020 ket mausar payen iti pannakagatang iti ayuda para kadagiti kabarangayanna.
Inbatad na a narigat ti sitwasyon da ken dakkel ti panagamakda agsipod ta nu adda manen ti agpositibo iti virus, masapol a mairugi manen ti 14-day a lockdwon iti nasao a barangay agingga nga awan ti maimaldit a positibo.
Inpakaamo ni Morales nga iti intero a Brgy. 1 ket adda laengen ti dua a sitio nga awanan ti kaso ti covid-19.
Innayun na nga iti las-od ti maysa a lawas ket arigna naartapan ti Brgy. 1 ti nairekord ti intero a Laoag a kaso gapu ta agdagupen ti 70 ti kaso iti barangayda, kas maibasar iti kaudian a datos ti gobierno probinsyal.
Maipalagip a namunganay ti panagadu ti kaso ti covid-19 iti Brgy. 1 kalpasan ti nagpositibo dagiti 22 a partidor iti slaughter house ken ti pannakaisayangkat ti expanded mass testing.
