LAOAG CITY – Inrakurak ni Sen. Sherwin Gatchalian a nakasagana daytoy nga agbalin a Senate President no kasapulan iti agtultuloy a sayangguseng mainaig iti posible a panagbalbaliw iti liderato ti Senado.
Inbatad ni Gatchalian a tinalantan ti minority bloc ti sumagmamano a posibilidad mainaig iti situasion iti Senado ngem nagkedked daytoy a mangipaay ti naan-anay a detalye.
Daytoy ket kalpasan ti maipagarup a “kudeta” kontra ken ni Senate President Alan Peter Cayetano nupay awan pay ti kumpirmasion ti kastoy nga addang.
Ni Gatchalian ket karaman iti 11 a miembro a minority bloc a kimmontra iti pannakadutok ni Cayetano a sinuportaran met ti 13 a senador pakairamanan ni Sen. Ronald “Bato” dela Rosa.
Segun iti senador, ad-adda a kalikagumna a tutukan ti panagsubli ti dignidad ken imahe ti Senado.
Nupay kasta, kuna ti agpanpanday linteg a prioridadda ti panagtrabaho ken panagsubli iti normal a legislative agenda nga arig naan-annad maidasig iti rakurak iti radyo mainaig iti panagbalin a nakasagana iti liderato.
