LAOAG CITY – Inpetteng ni Senador Ping Lacson a nasken nga iti session hall isuda a sinango ken dinebate ni Senador Alan Peter Cayetano.
Sungbat daytoy ni Lacson iti agtultuloy a panangipetteng ni Cayetano nga isuna latta ti Senate President ken iti inaramid ti baro a majority block a panangideklarar a bakante ti posision kas Senate President ken panangdutok ken ni Senador Sherwin Gatchalian kas Acting Senate President.
Inbatadna a narigat a makidebate no iti Facebook a kanayon nga agsarsarita ni Cayetano.
Inpettengna a tallo nga aldaw a nagurayda iti panagatendar ni Cayetano iti plenario tapno makaisayangkat ti sesyon ngem saan daytoy a nagpakita tapno aramiden ti trabahona kas Senate President imbes ket kanayon iti facebook laeng nga agsarsarita.
Para iti baro a mayorya, bakante iti agdama ti posision a Senate President.
Kunana a daytoy ti rason isu nga Acting Senate President pay laeng ni Gatchalian gapu ta kurang pay laeng isunda ti maysa tapno agbalin a trese ken tapno pormal a makaelektar ken madutokan a Senate President ti nadakamat a Senador.
