LAOAG CITY – Napatibker manen ti sayangguseng a maaddaan ti baro a kudeta kontra iti liderato ni Senate President Alan Peter Cayetano kalpasan nga inparipirip ni Senador Vicente “Tito” Sotto III ti plano iti panaglukat ti sesyon ita nga aldaw ti Lunes Mayo 25, 2026.
It statement, inlawlawag ni Sotto a saan a nagulimek iti liderato ti Senado no di ket isuna a mismo ti nangiparuk-at a mapagbalin a senate president ni Senador Sherwin “Win” Gatchalian kasukat ni Cayetano.
Maipalagip a napadisi ni Sotto dua a lawasen ti napalabas kalpasan a nangabak kas baro a senate president ni Cayetano iti botos a 13-9-2 kalpasan a nagpakita ken nagsubli iti senado ni Senador Ronald “Bato” Dela Rosa kalpasan ti innem a bolan a saanna a panagpakpakita ken panaglangan na iti trabaho na.
Nupay kasta, iti agdama ket inbilin ti Department of Justice (DOJ) iti amin a law enforcement agencies partikular iti National Bureau of Investigation (NBI) nga anupen ti pugante a senador iti bileg ti warrant of arrest nga inparuk-at ti International Criminal Court (ICC).
Iti saludsud ti media no sigurado nga agbalin a senate president ni Gatchalian, insungbat ni Sotto a depende iti bilang ti baro a minorya a mangsukat ti agdama a liderato.
Inpaganetget ni Senador Panfilo Lacson nga “eminently qualified” ni Gatchalian para iti posisyon, ken inpetteng na a saan laeng a ti kabaelan na no di ket karaman ti kinagaget ken panagbalin na a naan-anay a nakasagana kadagiti committee hearing ken dadduma pay a trabaho iti Senado.
