LAOAG CITY – Posible a saan pay a nalpas ti riribok iti Senado kalpasan a rimsua ti maipagarup a kudeta iti liderato ti Senado no sadinno a maidurduron ni Senador Sherwin Gatchalian a mabalin a kasukat ni Senador Alan Peter Cayetano kas Senate president.
Iti baet ti agtultuloy a tension iti Senado, kuna da Senador Francis “Kiko” Pangilinan ken Senador Panfilo “Ping” Lacson a ni Gatchalian ti makitkitada a mangidaulo kadakuada iti Senado.
Inbatad ni Pangilinan, suportado ti “Solid Bloc 11” ni Gatchalian tapno mangidaulo iti Senado idinto a kuna ni Lacson nga adda ti kabaelan ken padas daytoy tapno maisubli ti kredibilidad ti institusion kalpasan ti nagsasaruno a kontrobersial kadagiti naglabas nga aldaw.
Iti baet nga awan ti direkta a kumpirmasion nga adda ti main-inaw a baro a panagsukat ti liderato, rumrummuar a saan pay a naan-anay a natibker ti baro a mayorya a nabukel kalpasan a napadisi ni dati a Senate President Vicente “Tito” Sotto III idi Mayo 11.
Daytoy ket kagiddan ti nagsasaruno nga isyu iti Senado pakairamanan ti napasamak a pammaltog iti uneg ti pasdek ti Senado, dagiti saludsod iti seguridad ken ti kontrobersial a panaglibas ni Senador Ronald “Bato” dela Rosa manipud iti kustodiar ti Senado.
Inpetteng ni Gatchalian a nakasagana daytoy nga aklonen ti panangidaulo iti Senado no kasapulan nangruna iti sango ti panangtingiting iti impeachment kontra ken ni Vice President Sara Duterte.
Inadmitirna a dakkel ti epektona ti imahe ti Senado dagiti riribok a napasamak kadagiti naglabas a lawas.
Inpaganetget ti minorya, masapul a maisubli ti dignidad ken talek ti publiko iti Senado kabayatan a sigsiguradoennga agbalin a patas ken awan ti kankanunongan ti panangiggem iti impeachment trial kontra bise presidente.
