LAOAG CITY – Naan-anayen a saan nga inraman ti Gilas Pilipinas iti lineup ni Kai Sotto para iti third window ti FIBA Asia Cup 2025 inton Agosto.
Inbatad ni Gilas coach Tim Cone, posible nga agbayag agingga iti maysa a tawen ti panagimbag ni Sotto iti torn ACL iti tumengna isu nga imposible a mairaman iti torneo a maisayangkat idiay Saudi Arabia.
Gapu iti daytoy, kalikagumda a makadua ni Sotto iti World Cup qualifiers inton sumaruno a tawen.
Mangnamnama ni Cone nga agbalin a balligi ti maiwayat nga operasion ni Sotto inton Pebrero.
Naammoan a kas kasukat ti 7-foot-2 a ni Sotto ket ni Troy Rosario ti sumabak iti Asia Cup Finals Qualifiers inton sumaruno a bulan.
Makalaban ti Gilas ti Taiwan ken ti New Zealand.
Maipalagip a nagsagaba ni Sotto ti injury-na iti panagay-ayamna iti Japan B. League idi Enero.
