LAOAG CITY – Nagballigi dagiti kameng ti Criminal Investigation and Detection Group (CIDG) iti inyuswat da a search warrant operation iti balay ni Joseph Saladino, addaan iti umno a tawen ken residente iti Barangay Peralta, Dingras, Ilocos Norte.
Ti search warrant ket inparuk-at ni Hon. Judge Francisco Quilala iti RTC Branch 14 ditoy ciudad ti Laoag.
Nakakumpiskar dagiti otoridad iti balay ni Saladino iti maysa a kalibre 45 a paltog, addaan ti serial number, addaan ti maysa a magazine nga adda karga na a bala ti nasao a paltog.
Malaksid ti daytoy, adda pay ti nakumpiskar dagiti otoridad a 20 a bala ti kalibre 45 a paltog, 22 a bala ti cal. 38 ken 4 a kapsula ti cal. 38.
Naamoan a ni Saladino ket aglaklako kadagiti meryenda kas iti tupig, bibingka ken dadduma pay.
Iti agdama, nagtalinaed ni Saladino iti kustodyar iti CIDG ken manamnama a maipila ita nga aldaw ti kaso kriminal kontra kenkuana.
