LAOAG CITY – Naminpinsan a nauram ti maysa a kamarin wenno paglinongan ti baka a kukua Mr. Rolando Abadilla Jr. idiay Barangay 43, Cavit ditoy ciudad ti Laoag.
Segun kenni SFO1 Lowell Tungpalan, ti chief operation investigator ti BFP ditoy ciudad ti Laoag, daytoy ket gapo iti kwitis nagdisso iti tuktuk ti kamarin.
Daytoy ket basar iti palawag ni Valentin Yala, caretaker ti nasao a compound.
Inbatad na nga idi nakadanon da iti nakapasamakan ti uram ket awan ti nakita da a dingwen nga adda iti uneg ti kamarin.
Kunana nga alisto a nagramram ti apoy gapo ta ti nasao a kamarin ket naaramid iti kayo ken ti atep na ket labig.
Naamoan nga agarop 100 a metro ti kaadayo kadagiti balbalay manipud iti nakapasamakan ti uram.
Innayon na a ti 15×15 ti kalawa na a kamarin ket awan ti linya na ti kuryente.
