LAOAG CITY – Nangipila iti panagkiddaw iti International Criminal Court (ICC) Pre-Trial Chamber ti defense team ni dati a Presidente Rodrigo Duterte mainaig iti admission process kadagiti biktima a mangipaay ti testimonia maipanggep iti Crimes Against Humanity case daytoy.
Inallukoy ti kampo ni Duterte a ti International Criminal Court Office of Public Counsel for Victims ti palubusan laeng nga agbalin a legal representatives dagiti biktima ken saan a dagiti bukudda nga abugado.
Daytoy ket tapno maipasigurado a saan a maapektaran ti karebbengan ni Duterte iti “speedy judicial process.”
Mamati ti defense team nga adu nga oras ti kasapulan no awaten amin dagiti abugado manipud kadagiti private petitioners.
Iti agdama, awan pay ti inruar a reaksion ti kampo dagiti biktima ti war on drugs iti nasao a banag.
