LAOAG CITY – Kwinestyunaran ni Nicholas Kaufman, abogado ni dati a Presidente Rodrigo Duterte ti “Report on the Assessment by the Medical Officer of the Detention Centre” a mangtratratar iti medikal ti kliyente na.
Iti maysa a dokumento nga inparuk-at ti International Criminal Court (ICC) a napetsaan ti Oktubre 9, 2025, nakailanad dagiti sumagmamano a vital information mainaig iti salun-at ti dati a presidente.
Segun kenni Kaufman, saan a naikkan iti aniaman a written consent manipud kenni Duterte para iti panangidatag ti personal nga impormasyon nga adda ti pakainagan na iti health condition daytoy.
Kunana a naipakita laeng kenkuana ti maaw-awagan a “Factual Report” iti paragraph 16 ti dokumento iti uneg ti ababa a panawen sakbay a naisubli kadagiti otoridad iti detention center.
Malaksid iti daytoy, kunana a saan pay a napalubusan a makaala ti kopya iti nasao a report.
Binabalaw ni Kaufman ti maibagbaga nga “informed written consent” a naala manipud kenni Duterte ken inpetteng na a saan a valid daytoy.
Inlawlawag na pay nga inadmitir kenkuana ni Duterte a binutbuteng ti maysa nga indibidual a saanen a nainaganan iti dokumento.
Inawagan ti depensa nga “unprecedented and ethically questionable” ti proseso iti panangala ti pammalubos ken panangiggem da iti report mainaig iti medikal.
Inbatad pay ni Kaufman a nabayag nan nga inpakammo iti Registry ti ICC ti kondisyon ni Duterte ngem nabalewala daytoy ken nagresulta iti maysa nga “unilateral reprimand” kontra kenkuana.
