LAOAG CITY – Kwinestyunaran ti kampo ni dati a Presidente Rodrigo Duterte ti kauneg ken kinapudno dagiti ebidensya nga inpresentar ti prosekusyon, partikular dagiti akusasyon a widespread wenno systematic ti serye dagiti pammapatay iti Davao.
Iti maikatlo a panagdengngeg, naiget a naglikudan it defense counsel dagiti akusasyon ken inkalintegan na a ti naipila a Count 1 ti kaso ket sakupen na laeng ti siyam nga insidente ti pammapatay iti maymaysa a ciudad.
Sinungbatan met ti depensa dagiti nagbalin a rakurak ti nangibagi ti prosekusyon a ni Ms. Robin Kraft, a maikonkonektar iti maysa a quarry site kas maysa a maipagarop a mass grave.
Segun iti depensa, naaddaan ti umdas a panawen ken gundaway dagiti otoridad ti Pilipinas tapno mangisayangkat ti naun-uneg nga imbestigasyon sipud naisubli ti judicial warrant, ngem maipagarop nga awan ti inbunga na a natibker a pammaneknek.
Inpetteng ti kampo ti depensa a ti laeng nausar a pagibasaran ti prosekusyon iti nasao nga isyu ket ti nagbalin a rakurak ni dati a Senador Leila de Lima iti maysa a Senate Committee.
No maipapan met iti pannakaduktal ti sumagmamano a bangkay ti tao a possible a dagitoy ket dagiti paylaeng soldado nga hapon idi World War II, ken saan a manipod kadagiti biktima ti maipagarop nga extrajudicial killings.
Binabalaw pay ti abogado ti rakurak ti maysa a testigo a nangibaga a dagiti bangkay ket naibelleng iti baybay idiay Davao, nga inladawan ti depensa kas maysa nga outlandish assertion wenno mapagduduwaan nga akusasyon.
Inpaganetget ti depensa nga uray sawaren ti sibubukel a gulf ket awan ti aniaman nga ebidensya a rumuar a mangpaneknek kadagiti nasao nga alegasyon.
