LAOAG CITY – Inlawlawag ni Dra. Rhome Arlyn Pacis, maysa a neurologist a ti sakit nga epilepsy wenno kissiw ket maysa a sakit iti utek.
Inbatad na a mabalin a maaddaan ti primary epilepsy ti agtawen ti 3 agingga iti 10 gapu ta daytoy ket mabalin a matawid.
Segun ken ni Dra. Pacis, malaksid iti sintomas a panagtagtagerger ket karaman pay a mabalin a mapasaran ti maysa nga ubing nga addaan ti sakit nga epilepsy ket mapukawan ti poot, agmulmulengleng a mabalin a pakaapektaran ti performance na iti pagadalan.
Inbalakad ni Doctora Pacis a no sumken ti sakit ti maseknan ket masapol a bayabayen ken liklikan a maitupar ti ulo na iti natangken a banag.
Innayon na nga adda ti agas a tumaren ti maysa a pasyente tapno maliklikan ti panagpasar na kadagiti sintomas ti nasao a sakit.
Mainaig iti daytoy, inbatad pay ti doktor a dagiti possible a mang-trigger iti sakit nga epilepsy ket ti kanayun a panagpuyat, sobra a panagbannog, sobra a panagusar ti nagduduma a gadgets ken dadduma pay.
Malaksid iti daytoy, mabalin pay a ma-trigger ti sakit nga epilepsy babaen iti panaginom ti arak, nakaro a pannaka-expose iti napudot wenno nalamiis a paniempo.
Kuna na pay a ti sakit nga epilepsy ket makontrol ken maagasan laketdi saan a liwayan ti agtumar ti agas, disiplina iti bagi ken naan-anay a pannarabay ti pamilya.
