LAOAG CITY – Saan unay a maapektaran ti nangatngato a reciprocal tariff nga inpataw ti Amerika ti kangrunaan nga export products ti Pilipinas.
Iti Malacañang press briefing, inbatad ni Special Assistant to the President for Investment and Economic Affairs (SAPIEA) Frederick Go, masansan nga adu a pagilian ti apektado kadagiti maipatpataw a reciprocal tariff ngem iti kaso ti Amerika, pinili laeng dagiti produkto a mapatawan ti taripa.
Inbatadna a saan daytoy a sakupen dagiti produkto a semi-conductor ken electronics a kangrunaan nga ieks-export ti Pilipinas idiay Amerika.
Iti agdama, manarimaan ti panangarisit ti Department of Economy, Planning, and Development (DEPDev) ti pakabuklan nga epekto ti maipataw a taripa.
Inlawlawagna nga agtultukoy a nakabantay ti gobierno nangruna ket ipaspasimudaag ti Estados Unidos nga adalenda latta no agtalinaed a “tariff-free” dagiti industria ken produkto nga exempted pay laeng iti baro a pagannurotan.
Immuna iti daytoy, nairakurak nga inton Agosto 1 a mangrugi ti panagbalin nga epektibo ti 20% reciprocal tariff ti Amerika ditoy Pilipinas a nangatngato manipud iti immunan nga inanunsio a 17% idi Abril.
