LAOAG CITY – Dumuprak idiay Hong Kong ken southern China ti maibilang a kapigsaan a bagyo ita a tawen iti intero a lubong.
Gapu iti daytoy, ginasgasut a flights ti nakanselar, nasuspenso ti klase kadagiti pagadalan ken nagrikep dagiti pasdek negosio kabayatan nga umas-asideg ti Super Typhoon Ragasa.
Agarup 370 a ribu nga indibidual ti nagibakwit manipud iti Guangdong province idiay southern China kas panagsagsagana iti iduduprak ti kapigsaan a bagyo.
Mainaig iti daytoy, ti Super Typhoon Ragasa nga addaan ti local name a Super Typhoon Nando a dimmuprak iti amianan a paset ti Luzon ditoy Pilipinas.
Nangitunda daytoy ti pakdaar iti panaglayos, storm surges ken panagreggaay ti daga kadagiti umili.
Naammoan a ti nasao a bagyo ket manamnama nga ag-landfall iti Chinese province ti Guangdong inton bigat, aldaw ti Mierkoles.
Kabayatanna, adu kadagiti tattao idiay Hong Kong ken southern China ti nangaramid ti wagas tapno maprotehiran dagiti pagtaenganda iti pangta ti Super Typhoon Ragasa kas ti panangabbong kadagiti mabuong a tawa dagitoy.
