LAOAG CITY – Inlawlawag ni Brgy. Chairman Angel Ramil iti Barangay Corocor iti ili ti Bacarra a saan na a nakapinpinulapol ti nagpositibo iti covid-19 wenno ni IN-C559 a naggapo idiay Hawaii.
Segun kenni Ramil, kas mandar ti RHU ken kas kapitan ket kinuyog na ti convoy a nagluganan ti maseknan para iti pannakaipadalan ti swab test.
Inpetteng na nga adda ti bukod a lugan ti kabarangayan na ken nakaomotorsiklo met isuna isut gapo na a saan na nga inas-asitgan ti nasao nga indibidwal.
Kunana ti kapitan nga idi napan nagpaswab test ni IN-C559 ket isu laeng ti aldaw a pannakakita na iti daytoy ken posible a ti makitkita dagiti tattao a kasarsarita na ket ti kabsat ti pasyente bayat ti panangipan da ti stret light iti sango ti pagtaengan ti maseknan a nagpositibo.
Inbatad na nga uray ti kabsat ti pasyente ket saan pay nga immas-asideg kenni IN-C559.
Sungbat daytoy ni Ramil iti saludsod dagiti kabarangayan na a no apay a saan nga ag-quarantine iti laksid a mapmapan iti pagtaengan ti nagpositibo.
Mainaig iti daytoy, kunana nga agboluntaryo nga ag-isolate no laketdi adda kuma ti nakapulapol na a nagpositibo iti virus.
Innayon na a nakigtot isuna iti dimmanon nga inpormasyon ditoy Bombo Radyo seknan iti daytoy a banag.
Kabayatanna, karaman kadagiti na-contact trace a nakapulapol ti pasyente ket dagiti kabbalay na ken naka-isolate metten dagitoy ken manamnama a dumalan dagitoy iti swab test.
