LAOAG CITY – Linawlawagan ni Brgy. Chairman Roy Saducos iti Brgy Pasil iti ili ti Paoay ti naidanun a reklamo ditoy Bombo Radyo.
Daytoy ket mainaig ti panagpositibo ti antigen test ti ina ti secretary iti barangay da no sadinno a nag-isolate daytoy iti Barangay Isolation Unit (BIU).
Inbaga ti kapitan nga inbilin da met iti secretary da a masapol nga ag-isolate da iti balay da pakairamanan ti dua nga annak na, dua a kabsat, bayaw ken annak da, ken ti tallo a kaanakan na.
Nupay kasta, maipagarop nga adda latta ti makarkaruwar kadakuada iti baet a dagitoy ket maibilang a primary contact ti ina da a nagpositibo ti antigen test.
Inadmitir ti kapitan a pinalubusan ti maysa a kabsat ti secretary da a mapan taltalon tapno sarungkaran dagiti pagraepen da ken mangpakan kadagiti taraken da ngem masapol a suruten na ti health protocols kas ti saanna nga iyaasideg kadagiti tattao.
Inkalintegan ni Saducos a ti kinaado ti trabaho da ket saandan a mairapin ti mapan mangkita kadagiti pagubraen ti pamilya ti secretary da ken ti mangpakan kadagiti taraken da.
Innayon na nga inyuman na nga immuna iti DILG ken LGU iti ili ti Paoay ti panangpalubos na iti kabsat ti secretary da a rumuar tapno asikaswen na dagiti taraken ken monitoren dagiti pagraepen da no sadinno nga immannugot dagiti maseknan basta masurot dagiti health protocols.
Kabayatanna, inpasingked ni Saducos a mapmapan da met rondaan ti balay ti secretary da ken iti ayan ti ina na.
