LAOAG CITY – Naiget a naglikudan ni Barangay Chairman Avelino Pasion iti Barangay 39, Pasiocan iti ili ti Bacarra dagiti alegasyon kadakuada nga opisyal ti barangay.
Daytoy ket mainaig ti maipagarop a saanna a panangipaay ti relief goods iti maysa a sitio iti nadakamat a barangay.
Malaksid iti daytoy, maipagarop a dagiti innala da a miembro ti cash for work program ket kakabagyan da met laeng nga opisyal ti barangay.
Adda pay ti alegasyon nga isuda nga opisyal ti barangay ti mangidadaulo a mismo ti panaggiinom ti nasanger iti barangay da.
Inbatad ni Pasion a sapasap ti panagibunong da ti relief goods gapu ta uray dagiti adda ti kabaelan na iti biag ket naikkan.
Inpakaammo na a namintallo a daras da payen a nagibunong ti relief goods gapu ta adda ti kabarangayan da a balikbayan a nagdonar ken ti maysa a nagminatay iti barangay da.
Inlawlawag na a no dagiti met benepisyaryo ti cash for work program, mismo a dagiti Barangay Health Workers (BHW) ti nagpili ken amin a sitio ket naalaan ti sagtatallo.
Kabayatanna, no ti alegasyon kadakuada nga opisyal ti barangay nga isuda ti mangidadaulo a mismo ti panaggiinom ti nasanger iti barangay da ket inpetteng ti kapitan nga awan ti kinapudno na.
Inpetteng na nga inaldaw ken agrabrabii da nga agbantay kadagiti checkpoints isut gapuna nga awan ti oras da nga aggiinom kadagiti kakadwa na nga opisyal ti nasao a barangay.
