LAOAG CITY – Inlawlawag da Barangay Chairman Larry Alejandro ken ni Barangay secretary Analyn Tamandong iti Barangay Cataban ditoy ciudad ti Laoag ti naidanun a reklamo ditoy Bombo Radyo Laoag.
Daytoy ket mainaig iti maipagarop a panangkissay da ti sweldo dagiti nagtrabaho iti cash for work program iti nadakamat a barangay.
Iti palawag ni Kapitan Alejandro, dagiti pito a benepisyaryo ket 10 nga aldaw da laeng a nagtrabaho idinto a ti lima nga aldaw ket nangala da manen ti sabali a nagtrabaho.
Inpakaammo na a napagsasaritaan da a naimbag daytoy a banag isut gapuna a masdaaw da no apay nga adda ti nagbalin nga isyu.
Kuna met ni Tamandong a boluntaryo a napan insubli dagiti immuna a benepisyaryo ti sobra ti inawat da a sweldo nga isu ti naited kadagiti nagtrabaho iti lima nga aldaw.
Mainaig iti daytoy, kinumpirmaran ni Tamandong a lima kadagiti nagtrabaho iti cash for work ket barangay tanud gapu ta saan a makaumanay ti aw-awaten da nga honorarium iti kada bolan nga umabot laeng iti 800 a pisos.
