LAOAG CITY – Naipilan iti piskalya ti kaso a panagtatakaw kontra iti maysa a conductor ti Fariñas Bus a maipagarop a nangitaray iti koleksyon na.
Nabigbig daytoy a ni Mr. Joval Orpilla y Manzanillo, agtawen ti 43, naasawaaan ken residente iti Barangay Root iti ili ti Dingras.
Segun kenni Police Lt. Col. Amador Qiucho, chief of police ti PNP-Laoag, ti nagbalin a witness wenno nangirepresentar iti kompanya ket ni Mr. Pedro Baptista y Diego, agtawen ti 54, naasawaan, inspector ti bus ken residente iti Barangay 46, Nalbo ditoy ciudad ti Laoag.
Maipalagip a naakusaran ni Orpilla a nangitaray iti koleksyon a napasamak idi Setyembre 14, 2019 nga umabot ti 50 a ribo a pisos.
Iti inyuswat nga imbestigasyon idi ti PNP, apaman a nakababa aminen dagiti pasahero ti bus iti Barangay 51-A, Nangalisan ditoy ciudad ket bimmaba metten ni Orpilla, simmaruno ni Baptista bitbit na ti folder nga ayan ti imbentaryo kadagiti pasahero.
Rumrumuar a kellaat lattan nga inagaw ni Orpilla ti folder kalpasan na ket nagtartarayen nga immadayo karaman ti koleksyon da nga umabot iti 50 ribo a pisos.
