LAOAG CITY – Nangipila ti kaso administratibo iti Sangguniang Panlalawigan dagiti sumagmamano a kameng ti Sangguniang Bayan iti ili ti Solsona kontra kenni Mayor Joseph De Lara.
Daytoy ket naidasar iti Committee Report ti Committee on Laws nga idadauloan ni Atty. Da Vinci Crisostomo.
Basar iti Committee Report, naipila iti SP ti complain idi Enero 7 ita a tawen.
Segun kenni Crisostomo, namunganay daytoy kalpasan a nagkiddaw dagiti complainant a da SB Member Jovencio Pascua ken dadduma pay a kameng ti SB ti panagatendar dagiti department heads iti Executive Department.
Inlawlawagna a saan a pinatgan ni Mayor De Lara a mapaayaban dagiti department heads tapno pagsaludsudan ti Sangguniang Bayan dagiti nagduduma a proyekto a nakaigastosan ti COVID-19 funds.
Inbatadna a manamnama a masummonan ti respondent tapno sungbatan ti naipila a complain.
Rumrumuar nga 6 a kameng ti SB dagiti nagpila ti kaso administratibo kontra kenni Mayor De Lara.
Kabayatanna, nagkedked ni Mayror De Lara nga agkomento mainaig iti kaso administratibo a naipila kontra kenkuana.
Nupay kasta, kunana a ti abogado na ti mangtrabaho iti daytoy ken adda metten ti mandamus case nga inpila na kontra kadagiti kameng ti Sang. Bayan gapo iti saan da a panangaprubar ti budget ti ili da para iti 2021 ken iyuray na ti ummuna nga hearing iti daytoy.
