LAOAG CITY – Inpakaammo ti German Frontliner a ni Tobias Weniger nga umaboten ti nasurok a 146 a ribo a tattao ti naapektaran ti covid-19 idiay Germany.
Inbatad na a manipod iti nasao a bilang ket addan ti nasurok a 91, 500 ribo a nakarekobren idinto a nasurok met a 4,600 dagiti pummusay gapu iti virus.
Segun ken ni Weniger, nangrugi pay laeng a naipatungpal ti lockdown iti nasao a pagilyan idi Marso 21 ita a tawen.
Inbaga na nga iti babaen ti lockdown ket dagiti laeng supermarkets, pharmacia ken ospital ti nakalukat iti agdama.
Nupay kasta, kuna a maysa laeng a miembro ti pamilya ti mapalubusan a rumuar a mapan aggatang kadagiti kasapulan idinto nga awan ti mapalubusan a mapan bumisita iti kabagyan na iti ospital.
Mainaig iti daytoy, inpakaammo pay ni Weniger nga awan pulosen ti magatang a tissue kadagiti pagtagilakoan idiay Germany gapu iti kaado dagiti naggatang iti kallabes.
Kabayatanna, inbaga met ti asawa ni Tobias a ni Annalyn Weniger a limitado laeng ti bilang dagiti mabalin a sumrek kadagiti supermarkets ken pharmacia tapno masigurado a maipatungpal ti social distancing.
