LAOAG CITY – Inrakurak ti Department of Health (DOH) a nababbaba ti 48% ti nairekordda a kaso ti rabies ita a tawen.
Basar iti datos manipud Enero 4 agingga iti Marso 14 laeng ket addan ti nairekordda a 37 a kaso ti rabies a nababbaba ti 48% kadagiti kaso a nairekord iti kapada a petsa iti napalabas a tawen.
Iti baet daytoy, naiget latta ti pammalagip ti Department of Health iti publiko nga agbalin a naannad tapno saan a makagat ti ayup ita a panawen ti kalgaw.
Inbalakad ti Department of Health, nangatngato ti tsansana nga agkagat ti taraken nga ayup no nabara ti panawen.
Manamnama nga adu nga ubbing ti agay-ayam iti ruar kadagiti pagtaenganda gapu iti panawen ti bakasion iti pagadalan isut gapuna a nangatngato ti tsansana a makagat isuda ti walang nga ayup iti kalsada.
