LAOAG CITY – Naiyuswat ti kaunaan a regional convention ti Association of Agriculturist idiay probinsya ti La Union para iti pannakatratar ti nagduduma nga isyu iti agrikultura ken ad-adda a panangpadar-uas ti serbisyo ti agricture department.
Daytoy ti inbatad ni Engr. Ranieson Narciso, ti municipal agriculturist iti ili ti Solsona ken agdama a Vice President iti Region 1 Association of Agriculturist.
Kuna ni Narciso a dagiti nagatendar ket amin a license agriculturist iti intero a rehiyon 1 babaen iti pannakibinnulig ti municipal ken city league of agriculturist pakairamanan ti Provincial Agricuture Association.
Inlawlawag ni Narciso a malaksid iti panagtitipon dagiti licensed agriculturist iti intero a rehiyon ket ad-adda pay a kalikagum ti nasao a convention ti pannakaipresentar ti nagduduma a teknolohiya a makatulong iti panangpadur-ad ti sektor ti agrikultura.
Inbunannag na a karaman kadagiti baro a teknolohiya a naipresentar ket ti solar sea salt technology nga isu ti wagas tapno mapapintas ti kalidad dagiti maaramid nga asin iti rehiyon.
Kuna na a pakairamanan ditoy dagiti kabaroanan a wagas iti pannakapatanor kadagiti citrus ken dadduma pay a consiladation and clustering program ti Department of Agriculture.
