LAOAG CITY – Kalikagum nga ibasura ti House prosecutors iti Impeachment Court ti kiddaw ni Vice President Sara Duterte nga i-dismiss ti impeachment case kontra kenkuana.
Iti sungbat ti House prosecutors, inrakurakda a nasken a maaddaan ti “full trial.”
Basar iti House prosecutors, naruay a “misleading and false material statements” iti naisubmitir a sungbat “Ad Cautelam” ni Duterte.
Inpatulod ti House Prosecutors iti Impeachment Court ti 37 a panid a sungbat iti pleading ni Duterte.
Inuray ni Senate Secretary Renato Bantug Jr. a tumaktakder a clerk of court dagiti dokumento nga insubmitir ti prosekusyon.
Maipalagip a ti sungbat ti summons ti Impeachment court, inpetteng ti kampo ni Duterte a ti impeachment complaint a naipangato iti Senado ket nasken nga i-dismiss gapu ta daytoy ket awan ti epektibo sipod idi nangrugi.
Inpaganetget ti kampo ni Duterte ti pannakaipawil ti panangipila ti sumurok maysa nga impeachment complaint iti uneg ti maysa a tawen.
Kuna ni Bantug a mangipatulod ti kopya ti sungbat ti prosecution panel dagiti senador nga agtugaw kas judges iti impeachment trial.
Idi Pebrero na-impeached ni Duterte, ti Articles of Impeachment ket naipatulod iti Senado iti maudi a sesyon isu a saan daytoy a natalantan iti plenario sakbay nga agbakasion dagiti agpanpanday linteg.
Inlawlawag ni Bantug a ti asinoman a partido ket mabalin a mangipaay ti pleadings kadagiti sumaruno nga aldaw.
Saan nga inpakita ti media ti linaon ti 37 a panid a sungbat ti prosecutors ken ni Duterte.
