LAOAG CITY – Ibilang ni Mr. Marionito Nerez, Presidente ti Pamulinawen Transport Group Corporation iti ruta a Laoag-Gabu a dakkel a nayon iti inaldaw a birok iti panagpasadada iti posible a pannakaipangato ti plete.
Daytoy ket kalpasan a nagapela ti Alliance of Transport Operators’ & Drivers’ Association of the Philippines wenno ALTODAP iti Land Transportation Franchising and Regulatory Board ti piso agingga iti dua a pisos a nayon a plete dagiti pasahero ti jeepney.
Inbatad ni Nerez nga iti agdama ket dumanon iti 15 a pisos ti minimum fare dagiti pasaheroda ken nayon a dua a pisos iti kada kilometro ti singsingirenda.
Inlawlawagna a no bilang naan-anay a patgan ti Land Transportation Franchising and Regulatory Board ti kiddaw ti maysa a transport group ket dakkel daytoy a makatulong kadakuada nangruna ket nangina ti presio dagiti produkto a petrolyo.
Kabayatanna, inpetteng ni Nerez a saanda a kabaelan ti ag-avail para iti Public Utility Vehicle Modernization Program.
Maipalagip a nangipila ti petision dagiti tallo a transportation group iti Land Transportation Franchising and Regulatory Board a maipangato ti minimum jeepney fare iti lima a pisos ken dua a pisos a nayon para iti sumaruno a kada kilometro.
Immuna iti daytoy, naipila ti nasao a petision gapu ta agkurkurang ti mapaspastrekan dagiti jeepney driver gapu iti panagngato iti presio ti gasolina.
