LAOAG CITY – Ibilang ni Municipal Tourism Officer Mr. Cesar Jade Raquel ti ili a Badoc a ti panagbalin a Basilica Minore ti St. John the Baptist Church ket maysa a baton lagip no kasano ti kinapinget ti probinsya a mangitandudu iti benneg ti turismo.
Mamati ti municipal tourism officer a nangrugi ti kalikagum a mapagbalin a basilica minore ti simbaan da ti ili a Badoc iti panangirubuat ti probinsya iti provincial fiesta kas panagdaydayaw ken ni La Virgen Milagrosa de Badoc.
Impalgakna a daytoy ti nangpauneg iti pammati ken debosyon ken ni La Virgen Milagrosa a nangitunda iti pannakakoronana idi Mayo 31 itay napalabas a tawen 2018.
Inlawlawagna nga itan ket mariknan ti pannakaibukbuk ti adu a parabur saan laeng nga iti ili a Badoc ngem iti intero a probinsia.
Impannakkelna a mariknan ti “Vatican peace” ken ti “papal spirit” babaen laeng iti panagturong iti ili a Badoc.
Innayonna nga iti agdama ket maysan ti ili a Badoc kadagiti sumagmamano a lugar ditoy pagilian a pakasarakan iti Basilica Minore a daydaywen dagiti naruay a deboto manipud iti nadumaduma a paset ti pagilian ken ti intero a lubong.
