LAOAG CITY – Kinatangken ti ulo ti makaigapu nga umad-ado ti kaso ti covid-19 iti Barangay 3 iti ili ti Bacarra.
Daytoy ti inpetteng ni ABC Federated President George Padre iti ili ti Bacarra.
Inbaga ni Padre nga agsaksakripisyo da nga opisyal ti barangay gapu ta 24/7 nga agtrabtrabaho da no sadinno a mapan da pay aggatang ti
kasapulan dagiti kabarangayan da ngem saan met a makikooperar dagiti lumugar.
Innayon na a saan pay a rimuar ti resulta ti swab test dagiti kabarangayan da a naka-isolate ket kayat dan ti rumuar iti pagtaengan da.
Inpalgak na nga uray addan ti resulta ti swab test dagiti maseknan ket masapol nga ileppas da ti 14 nga aldaw a panag-quarantine da.
Gapu iti daytoy, immapela ni Padre ti tulong dagiti kabarangayan da babaen laeng ti panangsurot da kadagiti minimum health protocols.
Iti agdama, umaboten iti 22 ti kaso ti covid-19 iti nasao a barangay.
