LAOAG CITY – Binabalaw ni Sang bayan member Apolonio Medrano iti ili ti Sarrat ti liderato ni PCL President Handy Lao.
Daytoy ket gapu ta maipagarop a saan a patas ti trato ken saanna nga ammo nga iwanwan ni Lao dagiti pada na a konsehal ditoy probinsya.
Inyistorya ni Medrano nga iti panagatendar da iti PCL Congress iti Manila partikukar iti Belmont Hotel Manila ket nailanglangi da a kokonsehal iti ili ti Sarrat gapu ta arigna naka-quarantine da ti Covid-19.
Inpetteng na a malaksid nga adayo ti nagyanan da nga hotel ket saan pay a nakaay-ayo gapu ta arigna bungalow laeng daytoy ken napinpintas pay dagiti hotel iti Bacarra Road.
Innayon na a dagiti dadduma a pada da a kokonsehal ditoy probinsya ket nagyan da iti 5-Star Hotel ken asideg da laenge iti nakaisayangkatan ti PCL Congress.
Inyarig pay ni Medrano a no ditoy koma ciudad ti Laoag ti nakaisayangkatan ti PCL Congress ket ti ayan da nga hotel ket iti ili ti Adams.
Dinillaw pay ni Medrano ti saan pulos a panangkumusta ni Lao ti sitwasyon da a miembro na idinto nga adda ti cellphone ken group chat da.
Kabayatanna, adda met ti panangbabalaw ni Medrano ken ni dati a PCL President Domingo Ambrocio gapu ta saanna man laeng nga insuro ni Lao dagiti rebbeng na nga aramiden.
Inpalagip ni Medrano ti kinapintas ti liderato no Ambrocio idinto a ti nangsukat kenkuana ket arigna awan ti bibiang na kadakuada.
