LAOAG CITY – Inbatad ni Atty. Jason Perera, Sang Panlungsod member ditoy ciudad ti Laoag a nagdakkel ti gidyat ti singsingiren ti Benguet Electric Cooperative (BENECO) no ikompara iti Ilocos Norte Electric Cooperative (INEC).
Naamoan nga iti agdama ket adda a mismo ni Konsehal Perera idiay ciudad ti Baguio ken nagdamdamag maipapan iti baybayadan dagiti residente a kuryente.
Segun kenkuana, nababbaba nga adayo ti singir iti kuryente iti ciudad ti Baguio manipod iti BENECO no ikompara ditoy Ilocos Norte gapu iti kangato ti mabayadan iti kada kilowatt hr.
Inpalgak ni Perera a basar iti nagbalin a duktalna ket ado dagiti nagalaan a supplier ti BENECO ken pinili da no siasinno dagiti kababaan ti presyo na isut gapuna nga uray pandemya ket saan a ngumato ti baybayadan a kuryente dagiti residente.
Innayon na a saan a tinulad ti BENECO ti kontrata nga inaramid ti INEC a maymaysa laeng a supplier ti nangalaan da isut gapuna a maibilang a “disastrous” ti sinerrek a kontrata ti nasao a kooperatiba para kadagiti residente ditoy probinsya.
Gapu iti daytoy, nagpanawagan ni Perera iti INEC nga adalen da a naimbag daytoy a banag gapu ta ti nagbalin nga aksyon da ket saan a “best interest” ditoy Ilocos Norte.
Mainaig iti daytoy, kuna ni Perera a masapol nga agmaymaysa amin nga umili ditoy probinsya nga agprotesta tapno mariing ti INEC ken mangnamnama a magun-od ti napintas a resulta.
