LAOAG CITY – Inpeksa ni Sang Panlungsod Member Jaybee Baquiran ditoy ciudad ti Laoag ti sakit ti nakem na iti maysa a radio station kabayatan ti panag- privilege speech na.
Segun ken ni Baquiran, maipagarop nga inpatpatangatang ti saan nan a dinakamat nga estasyon ti radyo a nagkari daytoy idi panawen ti kampanya iti napalabas nga eleksyon a no mangabak ket awan ton ti eksaminasyon wenno seminar a pagdalanan dagiti agdama ken baro a tricycle driver ditoy ciudad.
Inpetteng na nga awan ti inkari na gapu ta rumbeng na laeng a dumalan ti eksaminasyon ken seminar dagiti maseknan a tricycle driver tapno maamoan ken mapalagipan da kadagiti surutenda a paglintegan.
Nagpanawagan ti konsehal nga agbalin koma a patas dagiti amin a kameng ti media kadagiti impormasyon nga ipatangatang da.
Iti biang ti Bombo Radyo Laoag ket awan ti nadakdakamat wenno naipatpatangatang nga isyu panggep ti nasao a banag.
Kabayatanna, inbatad ni Sang Panlungsod member Edison Bonoan a paayaban danto iti sumaruno a sesyon da dagiti tricycle drivers tapno mailawlawag kadakuada ti pakausaran ti masingsingir a 100 a pisos a para iti pannaka-laminate dagiti ID dagitoy.
