LAOAG CITY – Maalarma ni Sangguniang Panlungsod Member Dereck Lao iti panagkulimbitin dagiti badjao kadagiti jeep a dumaldalyasat iti Gilbert Bridge ditoy siudad ti Laoag.
Daytoy ti indasarna kabayatan iti naiyuswat a regular session iti Sangguniang Panlungsod.
Inlawlawagna nga adu dagiti badjao ti kellaat lattan nga agkulimbitin kadagiti jeep iti baet nga agan-andar daytoy.
Gapu iti daytoy, kunana a kasapulan a maammoan ti Department of Social Welfare and Development daytoy a banag tapno maliklikan ti aniaman a pannakadesgrasia dagitoy.
Kabayatanna, inpakaammo ni Vice Mayor Carlos Fariñas a binilinna ni Mrs. Perlita Cabello, mangidadaulo ti City Social Welfare and Development Office maipanggep iti nasao a banag.
Naammoan a dagiti maseknan a badjao ket manipud pay iti ili ti Badoc.
Nakikoordinar metten ti City Social Welfare and Development Office iti Municipal Social Welfare and Development Officer iti ili ti Badoc tapno dagus daytoy a masolbar.
Inpetteng ti Bise Mayor a masapol a maipangpangruna daytoy tapno saan a mangitunda iti aniaman nga insidente.
Kunana a no awan dagiti traffic enforcer nga agbanbantay kadagiti lugar ket gundawayan met dagiti badjao nga aglugan kadagiti jeep.
Innayonna a masapol a makikoordinarda iti Philippine National Police Laoag – Traffic Division tapno mas ad-adda pay a matutukan daytoy.
