LAOAG CITY – Inlawlawag ni Sang. Bayan Member Marvin Pascua iti ili ti Solsona nga addan ti iggem da a dokumento a mangipaneknek ti maipagarop a pannakaitransfer ti 23 milyon a pisos kenni dati a Sang. Bayan Member Marc Dennis del Castillo.
Segun kenni Pascua, ti dokumento ket mangipakpakita ti maipagarop a panangawat ni Del Castillo ti nasao a kantidad manipud iti akin-nagan iti account.
Inbatad na pay nga iti imbestigasyon, naestablisar da babaen kadagiti resource speaker a saan a nalpas ti proyekto a Pabahay ken ti official report ti DSWD Regional Office a nag-validate kadagiti 177 units a Pabahay.
Mainaig iti daytoy, kunana nga idi nabukel ti Pabahay Project iti ili ti Solsona ken basar iti testimonya dagiti officers ti NASA ket awan ti naiyuswat nga eleksyon iti opisyal ken rumrumuar nga intudo lattan ni Del Castillo dagitoy.
Dinakamat na a ditoy a nalukatan ti bank account a kukua ti NASA ken ditoy ti nakaipanan na ti 23 milyon a pisos ken iti withdraw ti kantidad ket kontra iti nailanad iti MOA a 50 a porsiento kuma pay laeng ti ummuna a mai-download ngem naminsan laeng a nairuwar ti kwarta iti Enero 9, 2017.
Naamoan a ti nailatang a pondo iti maysa nga unit ti Pabahay ket 130 a ribo a pisos ngem maipagarop nga ado dagiti saan a naitungpal.
Gapo iti daytoy, kunana a basar iti palawag dagiti benipisyaryo ket dagitoyen ti nangituloy wenno nangibaklay ti magastos tapno malpas ti balay.
Malaksid iti daytoy, naduktalan na pay a dagiti dadduma a materyales ket nagatangen iti laksid nga awan pay ti pondo daytoy.
Innayon na pay a bassit laengen a panawen ti masapol sakbay a makumpleto ti imbestigasyon ti pabahay issue ken no kasano a napasamak daytoy.
