LAOAG CITY – Inlawlawag ni Sang. Panlungsod Member Jason Perera a nasken nga iti kabiitan a panawen ket masolbar ti problema iti emergency hotline.
Rakurak na daytoy iti naduktalan da nga adda ti problema ti hotline ti Philippine National Police (PNP) ditoy ciudad ti Laoag rason a saan a matawagan idi adda ti napasamak a desgrasya iti kallabes.
Segun kenni Perera, agmaymaysa kuma ti emergency hotline ken masapol nga adda ti kanayon a nakabantay no sadinno daytoy ti mangipakammo kadagiti maseknan nga ahensya a kasapulan nga agresponde ken amin a conversation ket mairekord.
Malaksid iti daytoy, kunana a nasken pay a ma-upgrade dagiti pasilidad ken mapadur-as ti serbisyo a maipapapay iti umiili.
Mainaig iti daytoy, inbatad na nga alaen da met ti kapanpanunutan ti IT expert mainaig iti daytoy ken no mano ti magastos, ngem agkiddaw da pay ti pammalubos kenni Mayor Michael Marcos Keon tapno agatendar iti sumaruno a sesyon ti maseknan nga IT expert.
Kabayatanna, ummunan nga inbatad ni Police Lt. Col. Joemar Labiano, ti chief of police ti PNP-Laoag a naipadanon dan daytoy iti kompanya a nagpakonektaran da iti telepono da ken naaksyunanen babaen kadagiti maintenance personnel.
Nupay kasta, kunana a kalpasan ti sumagmamano a bulan ket kastoy manen ti problema da ngem dagus met laeng a naireport iti kompanya.
Innayon na a gapo iti daytoy ket naestablisar ti alternatibo nga emergency hotline ken naipublikar daytoy babaen iti Project Buzzer.
