LAOAG CITY – Kinumpirmaran ni Department of Public Works and Highways Sec. Vince Dizon a saan a ghost project ti kontrobersial a Loing-Mangitayag Bridge iti Barangay Loing iti ili ti Piddig.
Segun kenkuana, saan a ghost project ti nasao a proyekto gapu ta adda met dagiti naipatakder ngem saan laeng a nalpas gapu ta kurang ken naibus ti pundo daytoy.
Inbatadna a naiget ti pammilin ni Presidente Ferdinand Marcos Jr. iti Department of Public Works and Highways a masapul nga iprioridad ti ahensia a palpasen pay laeng nga umuna dagiti proyekto a saan pay a nalpas.
Inlawlawagna a mapaspasamak dagitoy gapu ta saan a mapunpundoan nga husto dagiti proyekto a mangitunda ti pannakaitantan ti pannakaaramidna.
Mainaig iti daytoy, nalpasen ti Phase 1 ti proyekto a napundoan ti 30 a milyon a pisos a sakupen ti pundasion ken dagiti poste ti rangtay no sadinno a nagkiddaw ti ahensia ti nayon a 20 a milyon a pisos para iti Phase 2 ken naan-anay a pannakakumpleto ti 61-meter bridge.
Naammoan nga apaman a malpas ti proyekto ket al-aliston ti biahe dagiti motorista iti ili ti Piddig manipud iti Barangay Loing nga agturong iti Barangay Bimmanga, Mangitayag ken Tonoton.
Kabayatanna, inpasingked ni Sec. Dizon a malpas ita a tawen dagiti tallo a maar-aramid a rangtay iti Loing-Mangitayag, Cabaroan ken Estancia.
