LAOAG CITY – Naiget a kinondenar ti 30 a dadakkel ken maimpluwesiya a grupo dagiti negosyante iti pagilian ti panagraira ti korapsyon iti gobierno.
Iti joint statement nga inparuk-at ti business groups, nagpanawagan dagitoy kadagiti corrupt officials nga isardengen ti panagkurakot ken kaasiyan dagiti marigrigat nga umili.
Inpetteng ti business groups ti pannangiyuswat ti independent body ti naun-uneg nga imbestigasyon tapno usigin dagiti kurakot nga opisyal, ipabalud dagitoy ken pasublien dagiti tinakaw da a pondo.
Mainaig iti daytoy, inlungalong ti business groups ti 6-point action plan karaman ti panangbigbig kadagiti guilty iti pannakikunsabo iti panagtakaw manipod iti umili, panangsuporta kadagiti umili ken voter education campaigns tapno agbalin nga aware ti publiko iti korapsyon ken dadduma pay a saan a napintas a governance practices, agukkon kadagiti ebidensiya ti korupsiyon kontra kadagiti opisyal iti gobyerno partikular iti Department of Public Works and Highways, dagiti lokal a gobierno ken ti Commission on Audit karaman dagiti partners in crime da iti pribado a sektor tapno mapilaan ti maiyannatop a criminal ken civil cases.
Inrekomendar pay ti grupo nga i-blacklist dagiti notorious a negosyante ken kontraktor a nakikunsabo kadagiti kunniber a pulitiko ken opisyal, idaulwan ti individual signing ti Integrity Pledge a mangikarkari a saan a pasuksukan dagiti pulitiko wenno opisyal ti gobyerno kasukat ti panangipaay ti proyekto wenno pabor ken ginutigot da ti financial sector partikular dagiti bangko ken Anti-Money Laundering Council nga ipublikar dagiti money launderers ken dagiti saan a mailawlawag a kinabaknang da.
Inaramid ti grupo ti panawagan iti baet ti maanomalya a flood control projects ti Department of Public Works and Highways a maipagarop a pakairamanan ti sumagmaman nga agpanpanday linteg ken kontraktor.
