LAOAG CITY – Inbasura ti Korte Suprema dagiti petision a mangkukwestionar iti panagbalin a pannakaiyataday iti Konstitusion ti Republic Act No. 12232 a mangikeddeng ti termino ti Barangay ken Sangguniang Kabataan (SK) officials iti uppat a tawen.
Iti desision nga insurat ni Associate Justice Jhosep Lopez, nakailanad a saan a sakup ti three-year term limit dagiti barangay ken Sangguniang Kabataan officials kas ti ipatpatungpal kadagiti dadduma nga elective local officials.
Nangipila ti petision dagiti sumagmamano nga indibidual pakairamanan ti election lawyer a ni Atty. Romulo Macalintal a nangibaga nga invalid ti linteg gapu iti pannakapaay a sumurot iti pagannurotan iti pannakaitantan ti eleksion.
Inbatad dagiti petitioners a linabsing ti baro a linteg ti karebbengan dagiti umili a makabutos ken pimmabor met daytoy kadagiti agdama nga opisial.
Nupay kasta, basar iti Korte Suprema ti Kongreso ti kakaisuna nga addaan ti bileg a mangikeddeng ti termino para kadagiti barangay officials.
Iti babaen ti baro a linteg, maisayangkat iti umuna a Lunes ti Nobiembre 2026 ti sumaruno a Barangay ken Sangguniang Kabataan Election (BSKE) ken maiyuswat iti kada uppat a tawen.
Gapu iti pannakaitantan ti eleksion nga immuna a naikeddeng iti umuna nga aldaw ti Disiembre ita a tawen, inlawlawag ti Korte Suprema nga agtalinaed iti puesto dagiti agdama nga opisial agingga a saan pay a naelektaran dagiti mangsukat.
