LAOAG CITY – Kinumpirmaran ni Bgy. Chairman Oliver Balite iti Bgy. Naglicuan iti ili ti Pasuquin a nauram ti “apar” wenno kubo a nakaikabilan ti bilog ken dagiti kagamitan a pagkalap dagiti kabarangayaan na.
Segun ken ni Balite, kukua ti grupo a pakaibilangan ti agnagan ti Jessie Baclagan a kasinsin na ti nauram.
Kuna na nga agpapan ita ket awan pay ti suspek iti nasao nga uram.
Nupay kasta, naamuan na a tallo dagiti rumrumuar a makin-aramid iti nasao nga uram basar kadagiti residente nga adda iti asideg iti daytoy ken nakabutas dagitoy.
Rumrumuar pay nga immuna sinibugan da ti gasolina ti patakder kasanguanan a pinuuran da.
Pattapattaen ni Balite nga umabot ti nasurok a 50 a ribo a pisos ti balor dagiti nauram a pagkalap ken ti pakailinlinungan na a kubo.
Kageddan daytoy, lineplepan ti kapitan ti barangay ti panagamak dagiti kabarangayan na iti posible a maulit ti nasao a pasamak gapu ta adda dagiti kameng ti bantay dagat a napusgan a mangkita kadagitoy.
Saan met pay nga ammo ti motibo ti nasao a pasamak ngem patien ni Balite ta amangan no apal.
Mainaig iti daytoy, awan pay ti maestablisar ti Bureau of Fire Protection (BFP) ti ili ti Pasuquin no ania ti motibo ti pannakauram ti “apar” wenno kubo a pakailinlinungan ti bilog ken dagiti kagamitan a pagkalap iti Bgy. Naglicuan ti nasao nga ili.
Inbatad daytoy ni S/F02 Jowen Quepo ti Bureau of Fire Protection ti nasao nga ili.
Segun ken ni Quepo, agtultuloy pay laeng ti imbestigasyon da iti nasao a pasamak.
Kinuna na a saan pay a mabalin a maibaga a nairanta ti nasao nga uram.
Inbaga na nga awan “time line” ti imbestigasyon nga ar-aramiden da.
Mainaig iti daytoy, nagpannawagan ni Quepo kadagiti adda ammo na ti nasao a pasamak ti itutulong da iti iwaywayat da nga imbestigasyon.
