LAOAG CITY – Natay ti maysa a lakay kalpasan a maipagarup a naglemmes iti baybay iti Barangay Calayab ditoy ciudad ti Laoag.
Nabigbig ti biktima a ni Santos Mariano, agtawen ti 69, residente ti Brgy. 27 ditoy ciudad.
Iti eksklusibo nga interview ken ni Barangay Chairwoman Marvelyn Padayao iti Barangay Calayab, timmawag kenkuana ti PNP-Laoag gapu ta napan nagpatulong dagiti annak ti biktima gapu ta mapukpukaw ti ama da.
Inbatad na nga iti panagturong da iti igid ti baybay ket apagisu met a guyguyudenen ti Chief Tanod ken ni Barangay Tanud Rowell Pacual ti biktima manipod iti baybay.
Segun ken ni Padayao, oumurpurawen ti biktima idi maiyaon manipod iti danom ken bumbumsog ti buksit na.
Innayon ni Padayao nga apaman a naiyaon ti biktima ket inkarigatan dagiti maseknan a biagen babaen iti panangipakat da ti “first aide” sakbay nga intaray da iti ospital, ngem saan dan a nasalbar ti biagna.
Naamoan a ti biktima ket nakalugan ti motorsiklo a napan iti baybay ken maipagarop a depresyon ti makaigapu ti nagpakamatayan na ken nangibati pay ti “suicide note” iti compartment ti motorsiklo a nagluganan na.
