LAOAG CITY – Liday ken ragsak ti marikrina ti pamilya ti kaunaan a cornea donor iti Region 1 gapo iti laksid a napukawan da iti ipatpateg iti biag ket balligi ti panang-recover dagiti doktor iti eye tissue ti donor ken maipaay daytoy iti agtawen ti 11 nga ubing.
Segun kenni Mrs. Clarissa Magno, asawa ti cornea donor, idi sibibiag pay laeng ti asawa na ket mapagsarsaritaan da ti pakaseknan iti panagidonar ti organ ken maysa kadagiti kalikagom na nga idonar ket ti kidney na.
Inlawlawag na nga idi pimmusay ti asawa na gapo iti Community Acquired Pneumonia ket naibaga kadakuada ti kaanakan na nga agtrabtrabaho iti ospital ti pakasennan iti programa da a Cornea Retrieval no sadinno ket awan pay ti nagidonar.
Kunana a naibaga amin iti miembro ti pamilya kangrunaan na kadagiti annak ti donor ken immannugot met dagityo nangruna ket makatulong iti kasapulan.
Inbatad a kas paset ket dimmalan isuna iti counseling ken amin a nasken a proseso no sadinno nakita na ti kinapateg ti addang da gapo ta dakkel a namnama ti maipaay na iti agtawen ti 11 nga ubing a makaawat iti daytoy.
Mainaig iti daytoy, kunana pay a ti addang da ket kas panangtungpal iti kalikagom ti asawa na.
Naamoan a dua a mata ti donor ti naalaan ti cornea ken adda metten ti naawat na a mensahe a mangibagbaga a nasayaat ti kondisyon dagiti cornea.
Dinakamat pay ni Mrs. Magno a no kayat dan to a makita ti ubing a pakipaayan ti cornea ken ti pamilya ti maseknan ket mabalin danto a makita intono malpas ti operasyon.
Ummuna iti daytoy, balligi ti panang-recover iti eye tissue ti donor nga indaulwan ti Department of Ophthalmology partikular kenni Department Chair a ni Dr. Sofia Cecilia Sipin, ken Project Head ti Cornea Retrieval Unit a ni Dr. Maria Fe Navarette ken ti retrieval team ken naipatulod daytoy iti Eye Bank Foundation of the Philippines.
Nagyaman met ti liderato ti ospital iti panangidaulo ni Medical Center Chief Dr. Maria Lourdes K. Otayza, iti pamilya ti donor gapo iti natured ken dakkel a deisyon nga inramid dagitoy bayat nga adda da iti panawen ti panagladingit.
Kabayatanna, adda met ti naiyuswat a Walk of Honor kas panangrespeto iti ummuna a cornea donor babaen kadagiti empleyado ti ospital ti panangidaulo ni Dr. Modesty Leaño, Head ti Department of Pathology and Laboratories.
