LAOAG CITY – Nakaawat ti Guinness Record ti maysa a lalaki idiay China kalpasan a napapuligusna ti namin-adu a daras iti ramayna ti maysa a cell phone iti uneg ti maysa a minuto.
Kinumpirmaran ti records keeping organization a Guinness World Records a ni Chen Xiaoqing ti Fujian Province ti baro a world record holder ti titulo a “Most Spins of a Mobile Phone on One Finger in One Minute.”
Daytoy ket kalpasan a napapuligusna ti 320 a daras ti cell phone-na.
Naisayangkat ti record attempt ni Chen iti Fuzhou City kaduana dagiti pagayamna ken pamiliana a nagbalin kas taga-record ken witness.
Iti damo, namin-adu a daras a natnag ti cell phone manipud iti ramay ni Chen ngem saan a nagbayag ket napapuligusna daytoy iti namin-adu a daras ken na-break-na ti previous record.
