LAOAG CITY – Inrakurak ni Israeli Prime Minister Benjamin Netanyahu a paigetan ti Israel ti panangatake kontra iti Hezbollah.
Daytoy ket kalpasan a nangrugin ti panangatake ti Israeli military iti Lebanon.
Inbatad ti Israel Defense Forces a nangiwayatda ti strikes kontra iti Hezbollah sites iti Bekaa Valley iti daya ti Lebanon ken dadduma pay a lugar iti pagilian.
Mabutbuteng dagiti residente iti Beirut gapu iti lumawlawa a panangatake ti Israel a mabalin a mairaman ti kabisera ti Lebanon.
Maipalagip nga iti baet a napirmaan ti ceasefire agreement idi Abril 16 ket naiwayat latta dagiti drones ken rockets.
Immuna iti daytoy, agpada nga immannugot ti Lebanon ken Israel a maiyalud-od ti 45-day ceasefire ngem nagtultuloy latta ti panangatake ti dua a pagilian.
