LAOAG CITY – Maysa lalaki idiay Illinois, U.S.A. ti nanggandat a magun-od ti baro a world record iti babaen ti panag-squat nga awan pulos ti panagsardengna iti las-ud ti maysa nga aldaw.
Daytoy ket tapno makaukkon ti kuarta para iti maysa a charity, ginandat a gun-oden ni Tony Piraino ti Guinness World Record title a “Most Squats in 24 Hours (Male).”
Ti goal ni Piraino ket maabak ti current record holder a ni Joe Reverdes a nakaaramid ti 25 a ribu nga squats iti uneg ti 24 nga oras.
Rinugian ni Piraino ti world record attempt-na idi alas singko ti bigat ti Abril 4. Iti kada 22 nga squats, aginana ni Piraino ti 30 a segundo. Nalpas daytoy idi alas singko ti bigat ti Abril 5 no sadino nakairekord ti 26 a ribu nga squats.
Inaramid daytoy ni Piraino tapno makaukkon ti kuarta para iti Marion County Horizon Center ti Decatur and Mount Zion, maysa a charity a mangipapaay ti pabahay, employment opportunites kadagiti tattao nga addaan ti developmental disabilities.
Iti agdama, insubmitiren ni Piraino dagiti ebidensia ken witness testimony iti Guinness tapno marebyu daytoyen ken maikkanen ti official certification.
