LAOAG CITY – Naminsan manen a nakagun-od ti card designer a ni Rob Hallifax ti Guinness World Record gapu iti inaramidna a kadakkelan a baraha iti intero a lubong.
Ti King of Hearts-na a baraha ket 3 meters x 2.02 meters, dakdakkel ngem iti immuna a rekordna a 2.87 metro a nairekord idi 2020. Daytoy ti maikadua a Guinness ni Rob kalpasan a naaramidna ti kabassitan a baraha.
Ti disenio ti baraha ket maysa a photo mosaic a bukbuklen ti 3,432 selfies a simmuporta iti proyekto daytoy ni Rob. No adayo, arig gagangay laeng a King of Hearts, ngem no asitgan, makita ditoy dagiti selfies ken ti ladawan ti tarakenna nga ayup.
Kinasapulan ni Rob ti espesyal nga ultra-large format printer tapno maimprenta ti baraha iti nangato a resolusion. Ti kadakkel ken kadagsen daytoy ket nagbalin a karit iti transportasion ken panag-display.
Iti agdama, naka-display ti baraha iti opisina ti Guinness World Records idiay London kageddan ti selebrasion ti Guinness World Records Day 2024.
