LAOAG CITY – Nagkamang ti maysa a residente iti Sitio 3, Barangay 50, Buttong ditoy ciudad ti Laoag kalpasan a maipagarop a dinangran dagiti sumagmamano a Barangay officials.
Nabigbig ti biktima a ni Mark Ocampo y Diego, agtawen ti 47, naasawaan idinto a ti binigbig na a suspek ket ni Barangay Kagawad Philmar Oroceo y Topinio, agpada a ken residente iti nasao a barangay.
Basar iti palawag ni Diego, bayat nga adda daytoy iti pagtaengan ni Gilmark Reyes ken mangmangan idi napan ti suspek ken dagiti kakadwa na nga opisyal ken Barangay tanod ken maipagarop a dinanog da daytoy iti sumagmamano a daras iti nagduduma a paset ti bagi na.
Rumrumwar a ti motibo ti insidente ket ti saan nga husto a pannakaibunong ti Social Amelioration Program (SAP) ti DSWD.
Kabayatanna, nagkamang met iti PNP-Laoag ni Oroceo ken ti asawa na a ni Apple Jam Rambac Oroceo, agtawen ti 24 ken Barangay treasurer ken ti Chief Tanod a ni Ismael Paulino Antonio gapo ta maipagarop nga hinarass isuda ti grupo dagiti lallaki.
Binigbig da dagiti suspek a da Gilmark Reyes, addaan ti umno nga edad, Paul Jester Reyes, agtawen ti 21 ken ni Rock Xhernie Reyes, agtawen ti 18, agpapada met laeng a residente iti nasao a barangay.
Segun met iti palawag da Oroceo, bayat nga agrob-roving da iti agarop alas dyes ti rabii ket maipagarop a dinangran ni Gilmark ti ulo ti Kagawad ken nangala pay ti bato ken bayat iti daytoy ket nangala pay ti bato ni Rock Xhernie ken ibakal na iti kagawad ngem ti asawa na a ni Apple Jam ti maipagarop a natamaan ti akin-kannawan a siko na.
Naamoan a bayat pay iti daytoy ket rimwar met ni Paul Jester nga addaan ti maipagarop a paltog.
Mainaig iti daytoy, inbatad met ni Antonio a ginandat ni Gilmark a bakalen ti bato isuna ngem nakalisi isut gapo na a ti motorsiklo na ti natamaan ken insawang na a “Sika pay ti maysa, Awan lang ni Kapitan Pumatayak, Nalaka lang ti biag yo”.
Naamooan pay a ni Diego ket helper iti Pamilya Reyes ken maipagarop a nagprobokar gapo pay laeng iti SAP.
