LAOAG CITY – Balligi a naarestar ti maysa a lalaki babaen iti naiwayat nga Anti Illegal Drug Buy-bust Operation iti paset ti Sitio Lusong iti Brgy. 29 ditoy siudad ti Laoag.
Nabigbig ti suspek a ni Joel Borromeo, agtawen iti 31, awanan asawa ken residente ti Brgy. 18 ditoy siudad ti Laoag.
Natiliw ti suspek kalpasan a naglako ti maysa nga heat sealed transparent plastic sachet a naglaon ti maipagarup a shabu iti maysa a pulis a nagpammarang kas poseir-buyer.
Malaksid iti daytoy, naala manipud iti suspek ti innem nga heat sealed transparent plastic sachet a naglaon ti maatap a shabu, maysa nga heat sealed transparent plastic sachet a residue a mapapati a naglaon ti shabu pakairamanan ti dua a ribu a pisos a genuine ken boodle money a nausar kas buy-bust money.
Mainaig iti daytoy, naiget a naglikudan ti suspek a kukuana dagiti kontrabando a nakumpiskar kenkuana.
Nupay kasta, inadmitir ti nasao a suspek a ti naudi a panagusarna iti maipawil nga iligal a droga ket idi laeng napalabas a lawas.
Naammoan nga adda dagiti opisial ti barangay, pannakabagi ti Department of Justice ken ti kameng ti Media a saksi iti naiwayat nga operasion.
Kabayatanna, nakumpiskar pay ti motorsiklo a Yamaha nga agmaris ti maroon a nagluganan ti suspek.
