LAOAG CITY – Kinumpirmaran ni Police Chief Master Sergeant Prospero Tabangcura Jr., Deputy Chief ti PNP Piddig ti pannakatay ti maysa a lalaki kalpasan a nadesgrasya iti Brgy. Estacia iti nasao nga ili.
Binigbig na ti biktima a ni Edcel Ducadu y Jacinto, agtawen ti 35, balo, maysa a pintor ken residente iti Sitio Riquido iti nasao a barangay.
Segun kenni Tabangcura, itay bigat ket intawag kadakuada ni Barangay Kagawad Jojo Balai nga adda ti nakita da a nakadasay iti asideg ti Bangalan Bridge iti nadakamat a barangay rason a dagus da a nagturong iti lugar.
Inbatad na nga iti panagimbestigar da ket naggapo iti amyanan a paset ti Sitio Bangalan ken apaman a nakadanon iti ungto ti rangtay ket na-slide gapo ta adda ti sangkabassit a likkaong daytoy ken kasemsemento.
Gapo iti daytoy, kunana a naitupar ti ulo ti biktima ken nagsagaba ti sugat iti muging a nangitunda ti pannakatay na, ken saan a nakasuot ti helmet.
Rumrumwar a ni Ducadu ket adda iti impluwensya ti nasanger basar kadagiti naudi a nakadwa daytoy.
Mapatta-patta nga idi tengnga ti rabii a napasamak ti desgrasya ngem saan a dagus a nakita gapo ta awan unay ti balbalay iti asideg ti nakapasamakan ti insidente.
Naamoan nga arig na adda ti panagdudua dagiti kabagyan ti biktima iti pannakatay na isut gapo na nga intaray da latta iti Piddig District Hospital ken ditoy a naduktalan a pimmusay daytoy gapo iti pannakadesgrasya na kalpasan a naitupar ti ulo na.
