LAOAG CITY – Narekobre dagiti kameng ti PNP Paoay ken Criminal Investigation and Detection Group (CIDG) ti sumagmamano a bala, paltog ken eksplosibo iti maysa a balay iti Brgy. 20 Parationg iti ili a Paoay.
Nabigbig ti subject ti search operasyon a ni Marlon Sindayen y Alegado, agtawen ti 38, residente iti nasao a barangay.
Inyetnag ni Hon. Judge Francisco Quilala, presiding judge ti RTC branch 14 ti search warrant mainaig ti illegal possesion of firearms.
Naala dagiti otoridad ti maysa a kalibre 38 a paltog, lima a bala na, maysa empty shell, 5 a bala ti 12gauge shotgun, ken maysa a granada.
Mainaig iti daytoy, naglikodan ni Sindayen a kukua na dagiti naala nga ebidensya ken awan ti ammo na kadagitoy.
Innayon na nga awan ti ammo a nakaikasuan na.
Inpagarup pay ti asawa ni Sindayen a plastic ti narekobre a granada.
Kabayatanna, kinumpirmaran ni Police Sr. Insp. Granduer Tangonan, hepe ti PNP Paoay nga adda ti rekord ti suspek a ni Marlon Sindayen a natiliw babaen ti naiwayat a search operation iti balay na idiay Brgy. 20 Paratong iti nasao nga ili.
Kuna na nga adda ti rekord na mainaig iti panagpaputok ti paltog, maipagarup a gun for hire, ken panagtakaw.
Inadmitir ni Tangonan a dua a bulan da a minonitor ni Sindayen agingga nga adda ti nakaibaga nga adda ti ik-ikotan na a paltog.
Mainaig iti daytoy, kinumpirmaran pay ni Barangay Chairman Edilito Madarcos iti nasao a barangay a naireklamo ni Sindayen gapu ti panagtakaw na ti krudo ken gasolina manipud kadagiti makina a pagpadanum, agtaktakaw ti mais ken nagpaturong ti paltog itay kallabes.
