LAOAG CITY – Kinumpirmaran ni Police Master Sergeant Neil Jan Andres, chief investigator ti PNP-Dingras ti panangtagbat ti lalaki iti kabsat na iti Barangay Madamba iti ili ti Dingras.
Nabigbig ti biktima a ni Artemio Antolin Jr., agtawen ti 56 idinto a ti suspek ket ni Rani Antolin, agtawen ti 48, agpada nga awanan ti asawa, mangalap ken residente iti nasao a baragay.
Segun iti Andres, iti inisyal nga imbestigasyon da ket agpada a nakainom ti nasanger dagiti agkabsat ken manarimaan nga agbuybuya dagitoy iti telebisyon idi naaddaan da ti nabara a panagsinungbat.
Inbatad ni Andres nga adda ti tugtugawan ti biktima a buneng ken idi naaddaan da manen ti saan a panagkinnaawatan.
Gapo iti daytoy, inunaan ti suspek nga innala ti buneng a tugtugawan ti biktima ken intagbat na iti naminsan a daras iti likod ti ulo ti kabsat na.
Dagus a naitaray ti biktima iti Dingras District Hospital ngem nagbalin nga out patient met laeng kalpasan a nataming ti sugat na nga aguneg ti 1 inch.
Innayon ni Andres a kalpasan ti insidente ket dagus a naglibas ti suspek ken tugot na ti buneng nga inusar na iti nasao a panagtagbat.
Manamnama met a maipilaan ti kaso nga attempted homicide ti nasao a suspek.
Naamoan a normal laengen kadagiti agkabsat ti agriri tunggal makainom da ti nasanger.
