Agtultuloy a maag-agasan iti Gov. Roque Ablan Sr. Memorial Hospital ditoy ciudad ti Laoag ti biktima iti napasamak a panagtagtagbat iti Sitio Lusong Brgy. 29 ditoy ciudad.
Nabigbig daytoy a ni Reynante Arimbuyutan y Alcon, 40, awanan asawa idinto a ti suspek ket ni Joel Cabusi, kayong ti biktima, tubo iti Lasam, Cagayan ken agpada a residente ti nasao a barangay.
Basar iti inisyal nga impormasyon, naimatangan ti agnagan ti Reynaldo Pascua, residente iti nasao met laeng a lugar, ti pasamak.
Segun kenni Pascua, nakangeg ti naringgor iti ruwar ti pagtaengan na ket idi napan na kinita ket nakita na a kamkamaten ti suspek a nakaiggem ti buneng ti biktima.
Bayat iti panagtaray ti biktima ket naitakleb isut gapuna a nakamatan ti suspek ket dita a tinagbat na iti sumagmamano a daras.
Gapu iti daytoy, nagsagaba ni Arimbuyutan ti sugat iti nagduduma a paset ti bagi na idinto a dagus a naglibas ti suspek kalpasan a natagtagbat na ti biktima.
Rumrumuar a ti motibo iti insidente ket gapu iti dati a riri dagiti dua.
Iti agdama, agtultuloy ti manhunt operation kenni Cabusi.
